“AgrİVİsİon” Bİznes plan müsabİqəsİnİn qalİblərİ elan olundu

Avropa İttifaqının maliyyə dəstəyi ilə Avrasiya Əməkdaşlıq Fondu və “Konstitusiya” Araşdırmalar Fondu tərəfindən Lənkəran-Astara iqtisadi regionunda həyata keçirilən “AgriVision” layihəsi çərçivəsində “Biznes Plan Müsabiqəsi” qalibləri elan olunmuşdur.

“Biznes Plan Müsabiqəsi”nə təsərrüfat sahibi və xidmət təminatçılarından ibarət ümumilikdə 53 iştirakçı müraciət etmiş və onlardan müsabiqə şərtlərinə tam uyğun gələn 30 iştirakçı qalib gəlmişdir. İştirakçılar biznes planın ümumi keyfiyyəti, idea, layihənin icrası, marketinq və maliyyə planlaşdırılması kriteriyaları üzrə Azərbaycan Turizm Bürosu, Azərbaycan Turizm və Menecment Universiteti, Avrasiya Əməkdaşlıq Fondu, “Konstitusiya” Araşdırmalar Fondunun nümayəndələri və bir müstəqil ekspert tərəfindən qiymətləndirilib.

Müsabiqənin məqsədi Lənkəran-Astara iqtisadi rayonunda seçilmiş turizm məntəqələrində yeni aqrar/eko-turizm xidmətlərinin yaradılması, habelə mövcud olan bizneslərə öz aqrar/eko-turizm xidmətlərini təkmilləşdirmək üçün investisiyaların yatırılması, gəlir mənbələrinin şaxələndirilməsi və kənd yerlərində məşğulluq imkanlarının artırılmasına töhvə verməkdir. Qeyd etmək lazımdır ki, biznes planının hazırlanması və təkmilləşdirilməsi prosesi özü təsərrüfat sahibləri və xidmət təminatçılarının potensialının artırılması üçün əlavə bir vasitə rolu oynamışdır. Biznes planların turizm məntəqələrinin inkişaf strategiyalarına uyğunlaşdırılması tələbi isə inkişafda tutarlılığı, strategiyaların tətbiqini daha da artırır və turizm konsorsiumlarındakı tərəfdaşlığı gücləndirir. Nəhayət, müsabiqə qaliblərinə veriləcək 2000 avroya qədər mükafat məbləği turizm məkanlarının inkişaf strategiyalarının həyata keçirilməsi üçün ehtiyac duyulan vəsaiti təmin edir.

Regional dövlət qurumlarının nümayənləri və müsabiqə müraciətçilərinin iştirakı ilə Lənkəran şəhərində keçirilən tədbir zamanı “Biznes Plan Müsabiqəsi” qalibləri elan olunmaqla yanaşı, qaliblərə mükafat fondunun verilməsi və xərclənmə şərtləri barədə ətraflı məlumat verilmişdir