“Bakı Qİda Hakatonu” təlİmlərİ

“Bakı Qida Hakatonu” təlimləri keçirildi.

13-14 və 20-21 noyabr tarixlərində Avropa İttifaqının Azərbaycandakı Nümayəndəliyi, “Gənc Avropa Səfirləri” şəbəkəsi və “AgriVision” layihəsi ilə birlikdə təşkil edilən “Bakı Qida Hakatonu” ilə bağlı hazırlıq təlimləri keçirildi.

27-28 noyabr tarixlərində keçirilməsi nəzərdə tutulan “Bakı Qida Hakatonu”-nda dəstəklənəcək start-up ideyalarının daha səmərəli və effektiv formada ərsəyə gəlməsi üçün keçirilən təlimlər zamanı Bakıda fəaliyyət göstərən İT və Start-up icmalarının təmsilçiləri regionlardan gələn yerli qida istehsalçıları ilə bir araya gələrək bu sahəyə maraqlı olan iştirakçılara yerli qida istehsalı, paylanması və istehlakı ilə bağlı ən mühüm problemlər və imkanlar barədə məlumat verib. Həmçinin, bununla Lənkəran iqtisadi regionundan seçilən qida istehsalçıları və xidmət təminatçıları öz təcrübələrini və üzləşdikləri real çətinlikləri təlim iştirakçıları ilə paylaşmaq imkanı qazandılar.

Hər bir təlim Avrasiya Əməkdaşlıq Fondunun layihə üzrə koordinatoru Ramin Səfərzadə tərəfindən “AgriVision” layihəsi və “Bakı Qida Hakatonu” haqqında qısa təqdimatlar nümayiş olunaraq başladı. 13 və 20 noyabr tarixlərində Qida Dəyər Zəncirinin inkişafı üzrə mütəxəssis Yaqub Zeynalzadə “Qida istehsalçılarının üzləşdiyi çətinliklər” və “Ənənəvi Məhsullar və Aqrar turizm” mövzularından bəhs etdi. 14 və 21 noyabr tarixlərində isə proqram arxitektoru Babək Nağıyevin mentorluğu ilə “Kənd təsərrüfatında problemlər və texnoloji həllər” və “İnformasiya texnologiyalarının tətbiq sahələri” mövzusunda təlim keçirilib. Hər modulun sonunda iştirakçıların müzakirə edilən mövzular barəsində fikirlərini öyrənmək və yaranan sualları cavablamaq üçün “Sual-Cavab” sessiyası keçirilib, eyni zamanda çay fasiləsi zamanı iştirakçılara mentorlarla fikir mübadiləsi etmək imkanı yaradılıb.